ប្រែសម្រួល៖ ស្រីស្រស់
លោកស្រី James Lee Williams អាយុ ៣២ឆ្នាំ ដែលត្រូវបានស្គាល់ច្រើនថាជា The Vivienne និងជាអ្នកឈ្នះកម្មវិធីប្រកួតប្រជែង RuPaul’s Drag Race UK បានទទួលមរណភាព នេះបើយោងតាមការប្រកាសរបស់អ្នកនាំពាក្យ Simon Jones កាលពីថ្ងៃអាទិត្យ (ថ្ងៃទី៥ ខែមករា)។
លោក Jones បានសរសេរនៅលើបណ្តាញសង្គម X ថា “យើងមានសេចក្តីសោកស្តាយយ៉ាងខ្លាំងក្នុងការជម្រាបជូនថា លោកស្រី James Lee Williams ហៅ The Vivienne បានទទួលមរណភាពនៅចុងសប្តាហ៍នេះ។ James គឺជាមនុស្សដែលត្រូវបានគេស្រលាញ់យ៉ាងខ្លាំង មានចិត្តល្អ និងជាមនុស្សអស្ចារ្យម្នាក់។”
The Vivienne ដែលកើតនៅប្រទេសវ៉េល បានល្បីឈ្មោះក្នុងឆ្នាំ២០១៥ បន្ទាប់ពីបានក្លាយជាទូតសិល្បៈ Drag នៅចក្រភពអង់គ្លេសសម្រាប់កម្មវិធីទូរទស្សន៍អាមេរិក RuPaul’s Drag Race។ ឈ្មោះសិល្បៈរបស់លោកស្រី Williams ត្រូវបានបង្កើតឡើងដោយទទួលឥទ្ធិពលពីអ្នករចនាម៉ូដដ៏ល្បីឈ្មោះអង់គ្លេស Vivienne Westwood។
មនុស្សជាច្រើនបានសម្តែងការគោរពអាឡោះអាល័យចំពោះ The Vivienne។
កម្មវិធី RuPaul’s Drag Race បានសរសេរនៅលើ X ថា “ទេពកោសល្យ អារម្មណ៍សប្បាយរីករាយ និងការតាំងចិត្តរបស់គាត់ចំពោះសិល្បៈ drag គឺជាការបំផុសគំនិតមួយ។ យើងនឹងនឹករឭកគាត់យ៉ាងខ្លាំង ប៉ុន្តែកេរ្តិ៍ដំណែលរបស់គាត់នឹងនៅគង់វង្សតទៅ។”
អ្នកចម្រៀងនិពន្ធចម្រៀង Michelle Visage ដែលជាចៅក្រមនៃកម្មវិធី RuPaul’s Drag Race បាននិយាយនៅលើ Instagram ថា “ខ្ញុំមិនដឹងថាត្រូវនិយាយយ៉ាងម៉េចអំពីអារម្មណ៍របស់ខ្ញុំទេ។ យើងនឹងនឹករឭកអ្នកយ៉ាងខ្លាំង សូមឱ្យពន្លឺរបស់អ្នកបន្តភ្លឺចិញ្ចាចជារៀងរហូត៕”
ប្រភព៖ Reuters/sr
